శ్రీరామ శతకము – 65

సీ :   కౌసల్య దేవకీ గర్భంబులా నీకు
                   చెరసాలలాయెనా చిట్టి తండ్రి
         మధురలో కంసుడు మామ యేర్పరచిన
                   చెరసాలె పుట్టిల్లు చిట్టి తండ్రి
         కాంతల కౌగిళ్లె కఠినబంధములౌచు
                     చెరసాలలాయెనా చిట్టి తండ్రి
          భక్తుల హృదయాలె పరమాత్మ నీపాలి
                     చెరసాలలాయెనా చిట్టి తండ్రి

తే :   వింతవింతల చెరసాలలంతు దెలిసి
         నాదు హృదయమ్మె చెరసాల నవ్యమనుచు
          చేరిసంతృప్తి పూజలదేరి తండ్రి
          అందువుకొనవయ్య శ్రీరామ వందనములు !

                                    - శ్రీ తిరుకోవలూరు రామానుజస్వామి